koi to saughat uske shahr ki ghar le chalo

koī to sauġhāt us ke shahr kī ghar le chalo

kuchh nahīñ to jism par zaḳhmoñ kī chādar le chalo

pyaar ke bosīda phūloñ kī yahāñ qīmat nahīñ

shīsh-mahloñ se guzarnā hai to patthar le chalo

hoñge arbāb-e-tamāshā meñ kuchh ahl-e-dard bhī

chand aañsū bhī tabassum meñ chhupā kar le chalo

raat jab bhīgī to saa.e ne mujhe āvāz dī

maiñ hī tanhā.ī kā sāthī huuñ mujhe ghar le chalo

jaane kaise kaise sahrāoñ meñ ho apnā guzar

dosto āñkhoñ meñ ashkoñ kā samundar le chalo

dād-ḳhvāhī ko ye tanhā zaḳhm-e-sar kaafī nahīñ

munsifoñ ke paas patthar bhī uThā kar le chalo

der se sub.heñ khaḌī haiñ dar pe ā.īna-ba-dast

zindagī ko ab zarā ḳhvāboñ se bāhar le chalo

mujrim-e-haq shahr meñ mere sivā koī nahīñ

sang-andāzoñ kī bastī meñ mirā sar le chalo

raat us ke lams kī ḳhushbū ne chupke se kahā

yā yahīñ rah jaao tum bhī yā mujhe ghar le chalo

'tāhir' apne sar kisī kā ye bhī kyoñ ehsāñ rahe

apnī gardan ke liye ḳhud apnā ḳhanjar le chalo

koi to saughat us ke shahr ki ghar le chalo

kuchh nahin to jism par zaKHmon ki chadar le chalo

pyar ke bosida phulon ki yahan qimat nahin

shish-mahlon se guzarna hai to patthar le chalo

honge arbab-e-tamasha mein kuchh ahl-e-dard bhi

chand aansu bhi tabassum mein chhupa kar le chalo

raat jab bhigi to sae ne mujhe aawaz di

main hi tanhai ka sathi hun mujhe ghar le chalo

jaane kaise kaise sahraon mein ho apna guzar

dosto aankhon mein ashkon ka samundar le chalo

dad-KHwahi ko ye tanha zaKHm-e-sar kafi nahin

munsifon ke pas patthar bhi uTha kar le chalo

der se subhen khaDi hain dar pe aaina-ba-dast

zindagi ko ab zara KHwabon se bahar le chalo

mujrim-e-haq shahr mein mere siwa koi nahin

sang-andazon ki basti mein mera sar le chalo

raat us ke lams ki KHushbu ne chupke se kaha

ya yahin rah jao tum bhi ya mujhe ghar le chalo

'tahir' apne sar kisi ka ye bhi kyon ehsan rahe

apni gardan ke liye KHud apna KHanjar le chalo