koi tufan to nahin koi talatum to nahin

koī tūfāñ to nahīñ koī talātum to nahīñ

zindagī naam hai jis kā vo kahīñ tum to nahīñ

aur kyā kahiyegā ā.īna-e-hairat ke sivā

un kī mahfil meñ mujhe izn-e-takallum to nahīñ

jis taraf dekhiye ik nūr-e-tajallī paidā

aap kī bazm meñ shāmil mah-o-anjum to nahīñ

aur kyā dil kī tabāhī pe tavajjoh detā

aap dekheñ mire hoñToñ pe tabassum to nahīñ

aa.ina dekh ke ab pyaar sā aa jaatā hai

merī sūrat se numāyāñ ye kahīñ tum to nahīñ

mausam-e-lāla-o-gul ahd-e-bahār-e-gulshan

ye kahīñ aap kā andāz-e-tabassum to nahīñ

manzileñ apnī jagah par haiñ talab apnī jagah

jā hī pahuñchegā ki 'ehsās' abhī gum to nahīñ

koi tufan to nahin koi talatum to nahin

zindagi nam hai jis ka wo kahin tum to nahin

aur kya kahiyega aaina-e-hairat ke siwa

un ki mahfil mein mujhe izn-e-takallum to nahin

jis taraf dekhiye ek nur-e-tajalli paida

aap ki bazm mein shamil mah-o-anjum to nahin

aur kya dil ki tabahi pe tawajjoh deta

aap dekhen mere honTon pe tabassum to nahin

aaina dekh ke ab pyar sa aa jata hai

meri surat se numayan ye kahin tum to nahin

mausam-e-lala-o-gul ahd-e-bahaar-e-gulshan

ye kahin aap ka andaz-e-tabassum to nahin

manzilen apni jagah par hain talab apni jagah

ja hi pahunchega ki 'ehsas' abhi gum to nahin