koi ummid na bar aai shakebai ki

koī ummīd na bar aa.ī shakebā.ī kī

is ne bātoñ meñ bahut hāshiya-ārā.ī kī

ishq din-rāt rahā kaif-o-tarab meñ sarshār

husn ne saltanat-e-ishq pe dārā.ī kī

na milā par na milā apne masā.il kā hal

āstānoñ pe bahut ham ne jabīñ-sā.ī kī

aah ai soz-e-darūñ mere junūñ se ab tak

manzileñ sar na huiiñ bādiya-paimā.ī kī

soch kā loch kabhī un ko mayassar na huā

ba.az logoñ ne faqat qāfiya-paimā.ī kī

kār-e-bekār huī bus meñ safar kartā huuñ

ye bhī ik sūrat-e-be-kaif hai mahñgā.ī kī

sher kahtā rahūñ bahtā rahūñ apnī rau meñ

chheḌ chaltī rahe ehsās kī purvā.ī kī

ek sher aur sunā de ki zamāne bhar meñ

dhuum hai tere taġhazzul kī tavānā.ī kī

tañg-zarfī hai mire vahm kā Thahrā paanī

Thahre paanī pe jamī kaa.ī hai ḳhud-rā.ī kī

vā dareġhā ki zarā qadr na kī duniyā ne

'krishn-mohan' tire irfān kī gahrā.ī kī

koi ummid na bar aai shakebai ki

is ne baaton mein bahut hashiya-arai ki

ishq din-raat raha kaif-o-tarab mein sarshaar

husn ne saltanat-e-ishq pe darai ki

na mila par na mila apne masail ka hal

aastanon pe bahut hum ne jabin-sai ki

aah ai soz-e-darun mere junun se ab tak

manzilen sar na huin baadiya-paimai ki

soch ka loch kabhi un ko mayassar na hua

baz logon ne faqat qafiya-paimai ki

kar-e-bekar hui bus mein safar karta hun

ye bhi ek surat-e-be-kaif hai mahngai ki

sher kahta rahun bahta rahun apni rau mein

chheD chalti rahe ehsas ki purwai ki

ek sher aur suna de ki zamane bhar mein

dhum hai tere taghazzul ki tawanai ki

tang-zarfi hai mere wahm ka Thahra pani

Thahre pani pe jami kai hai KHud-rai ki

wa daregha ki zara qadr na ki duniya ne

'krishn-mohan' tere irfan ki gahrai ki