کوئی امید تو اس دل کی بر آنے دیجے

کوئی امید تو اس دل کی بر آنے دیجے

رنج کی بات نہ اب کیجئے جانے دیجے

ان کے چپ رہنے سے گو جان گئی کیا غم ہے

جی اٹھوں گا میں ابھی لب تو ہلانے دیجے

ہم بھی کہتے ہیں کہ خط آئے گا تب سمجھیں گے

غیر گر ان کو پڑھائے تو پڑھانے دیجے

رفتہ رفتہ یہ پہنچ جائے گا اس کے در تک

کاسۂ سر کو مرے ٹھوکریں کھانے دیجے

غیر کا رنگ کسی طرح نہ جمنے دیں گے

ہم کو اس بزم میں نقشہ تو جمانے دیجے

اس ستم گر کی جفاؤں کا مزہ آتا ہے

آسماں ہم کو ستائے تو ستانے دیجے

دیکھ کر ابر بہاری پہ گلوں کی چشمک

چشم گلگوں سے ہمیں اشک بہانے دیجے

شب وہ بولے رخ روشن سے ہٹا کر زلفیں

لو فداؔ صبح ہوئی اب ہمیں جانے دیجے