koi ummid to is dil ki bar aane dije

koī ummīd to is dil kī bar aane diije

ranj kī baat na ab kījiye jaane diije

un ke chup rahne se go jaan ga.ī kyā ġham hai

jī uThūñgā maiñ abhī lab to hilāne diije

ham bhī kahte haiñ ki ḳhat aa.egā tab samjheñge

ġhair gar un ko paḌhāye to paḌhāne diije

rafta-rafta ye pahuñch jā.egā us ke dar tak

kāsa-e-sar ko mire Thokareñ khāne diije

ġhair kā rang kisī tarah na jamne deñge

ham ko is bazm meñ naqsha to jamāne diije

us sitamgar kī jafāoñ kā maza aatā hai

āsmāñ ham ko satā.e to satāne diije

dekh kar abr-e-bahārī pe guloñ kī chashmak

chashm-e-gul-gūñ se hameñ ashk bahāne diije

shab vo bole ruḳh-e-raushan se haTā kar zulfeñ

lo 'fidā' sub.h huī ab hameñ jaane diije

koi ummid to is dil ki bar aane dije

ranj ki baat na ab kijiye jaane dije

un ke chup rahne se go jaan gai kya gham hai

ji uThunga main abhi lab to hilane dije

hum bhi kahte hain ki KHat aaega tab samjhenge

ghair gar un ko paDhaye to paDhane dije

rafta-rafta ye pahunch jaega us ke dar tak

kasa-e-sar ko mere Thokaren khane dije

ghair ka rang kisi tarah na jamne denge

hum ko is bazm mein naqsha to jamane dije

us sitamgar ki jafaon ka maza aata hai

aasman hum ko satae to satane dije

dekh kar abr-e-bahaari pe gulon ki chashmak

chashm-e-gul-gun se hamein ashk bahane dije

shab wo bole ruKH-e-raushan se haTa kar zulfen

lo 'fida' subh hui ab hamein jaane dije