koi us zalim ko samjhata nahin

koī us zālim ko samjhātā nahīñ

vo sitam karne se baaz aatā nahīñ

dasht-e-ġham meñ kab mirā naqsh-e-qadam

har qadam pe aañkh dikhlātā nahīñ

dard-e-furqat se zabāñ dāñtoñ meñ hai

kyā kahūñ kuchh bhī kahā jaatā nahīñ

chashm-e-dil se dekh use tū dekh le

chashm-e-zāhir se nazar aatā nahīñ

sabr-e-shauq-e-vasl-e-jānāñ kyā karūñ

par lagā kar bhī uḌā jaatā nahīñ

kab ḳhayāl-e-zulf meñ har raat ko

dil pe mere saañp lahrātā nahīñ

gul se nisbat kyā tire ruḳhsār ko

ye to vo gul hai jo kumhlātā nahīñ

dard-e-furqat se hai ab hoñToñ pe dam

phir bhī zālim ko taras aatā nahīñ

jaan lī hai jalva-e-ruḳhsār ne

qabr kī zulmat se ghabrātā nahīñ

husn kī ḳhuddāriyāñ to dekhiye

be-ḳhudī meñ bhī vo haath aatā nahīñ

vo nahīñ aate to nādir kyā galā

hosh jab do do dopahar aatā nahīñ

koi us zalim ko samjhata nahin

wo sitam karne se baz aata nahin

dasht-e-gham mein kab mera naqsh-e-qadam

har qadam pe aankh dikhlata nahin

dard-e-furqat se zaban danton mein hai

kya kahun kuchh bhi kaha jata nahin

chashm-e-dil se dekh use tu dekh le

chashm-e-zahir se nazar aata nahin

sabr-e-shauq-e-wasl-e-jaanan kya karun

par laga kar bhi uDa jata nahin

kab KHayal-e-zulf mein har raat ko

dil pe mere sanp lahraata nahin

gul se nisbat kya tere ruKHsar ko

ye to wo gul hai jo kumhlata nahin

dard-e-furqat se hai ab honTon pe dam

phir bhi zalim ko taras aata nahin

jaan li hai jalwa-e-ruKHsar ne

qabr ki zulmat se ghabraata nahin

husn ki KHuddariyan to dekhiye

be-KHudi mein bhi wo hath aata nahin

wo nahin aate to nadir kya gala

hosh jab do do dopahar aata nahin