koi yaad hi raKHt-e-safar Thahre koi rahguzar anjaani ho

koī yaad hī raḳht-e-safar Thahre koī rāhguzar anjānī ho

jab tak mirī umr javān rahe aur ye tasvīr purānī ho

koī naav kahīñ mañjdhār meñ Duube chāñd se uljhe aur udhar

maujoñ kī vahī halqa-bandī dariyā kī vahī tuġhyānī ho

isī raat aur din ke mele meñ tirā haath chhuTe mire hāthoñ se

tire saath tirī tanhā.ī ho mire saath mirī vīrānī ho

yuuñ ḳhāna-e-dil meñ ik ḳhushbū ābād hai aur lau detī hai

jo bād-e-shimāl ke pahre meñ koī tanhā raat kī raanī ho

kyā DhūñDte haiñ kyā kho baiThe kis ujlat meñ haiñ log yahāñ

sar-e-rāh kuchh aise milte haiñ jaise koī rasm nibhānī ho

ham kab tak apne hāthoñ se ḳhud apne liye dīvār chuneñ

kabhī tujh se hukm-udūlī ho kabhī mujh se nā-farmānī ho

kuchh yādeñ aur kitābeñ hoñ mirā ishq ho aur yārāne hoñ

isī āb-o-havā meñ rahnā ho aur saarī umr bitānī ho

koi yaad hi raKHt-e-safar Thahre koi rahguzar anjaani ho

jab tak meri umr jawan rahe aur ye taswir purani ho

koi naw kahin manjdhaar mein Dube chand se uljhe aur udhar

maujon ki wahi halqa-bandi dariya ki wahi tughyani ho

isi raat aur din ke mele mein tera hath chhuTe mere hathon se

tere sath teri tanhai ho mere sath meri virani ho

yun KHana-e-dil mein ek KHushbu aabaad hai aur lau deti hai

jo baad-e-shimal ke pahre mein koi tanha raat ki rani ho

kya DhunDte hain kya kho baiThe kis ujlat mein hain log yahan

sar-e-rah kuchh aise milte hain jaise koi rasm nibhani ho

hum kab tak apne hathon se KHud apne liye diwar chunen

kabhi tujh se hukm-uduli ho kabhi mujh se na-farmani ho

kuchh yaaden aur kitaben hon mera ishq ho aur yarane hon

isi aab-o-hawa mein rahna ho aur sari umr bitani ho