koi ye zahid se ja ke kah de ki rasm ulTi shabab ki hai

koī ye zāhid se jā ke kah de ki rasm ulTī shabāb kī hai

savāb meñ hai gunah kī lazzat gunah meñ lazzat savāb kī hai

ruḳh-e-munavvar pe dar-haqīqat misāl aisī naqāb kī hai

mah-e-do-hafta ke rū-e-raushan pe jaise chādar sahāb kī hai

kuchh aisī tauba-shikan har ik baat us but-e-lā-javāb kī hai

hai gesuoñ meñ ghaTā kā aalam nazar meñ mastī sharāb kī hai

in āñsuoñ ko gila na samjho ye dil se tañg aa ke gir rahe haiñ

isī ne rusvā kiyā hai har sū isī ne miTTī ḳharāb kī hai

yahī vo kuuza hai dil ki rahte haiñ band jis meñ hazār dariyā

yahī vo zarra hai dar-haqīqat ki jis meñ zau āftāb kī hai

naqāb rū-e-hasīñ uThā kar na is tarah ham ko bhuul jaao

murādeñ dil kī bhī puurī kar do agar nazar kāmyāb kī hai

kahāñ kī jannat kidhar kā dozaḳh kidhar kī duniyā kahāñ kā uqbā

ye sab fasāna ye sab kahānī 'sahar' faqat shaiḳh o shabāb kī hai

koi ye zahid se ja ke kah de ki rasm ulTi shabab ki hai

sawab mein hai gunah ki lazzat gunah mein lazzat sawab ki hai

ruKH-e-munawwar pe dar-haqiqat misal aisi naqab ki hai

mah-e-do-hafta ke ru-e-raushan pe jaise chadar sahab ki hai

kuchh aisi tauba-shikan har ek baat us but-e-la-jawab ki hai

hai gesuon mein ghaTa ka aalam nazar mein masti sharab ki hai

in aansuon ko gila na samjho ye dil se tang aa ke gir rahe hain

isi ne ruswa kiya hai har su isi ne miTTi KHarab ki hai

yahi wo kuza hai dil ki rahte hain band jis mein hazar dariya

yahi wo zarra hai dar-haqiqat ki jis mein zau aaftab ki hai

naqab ru-e-hasin uTha kar na is tarah hum ko bhul jao

muraden dil ki bhi puri kar do agar nazar kaamyab ki hai

kahan ki jannat kidhar ka dozaKH kidhar ki duniya kahan ka uqba

ye sab fasana ye sab kahani 'sahar' faqat shaiKH o shabab ki hai