koi zarra jo dil ki KHak ka barbaad hota hai

koī zarra jo dil kī ḳhaak kā barbād hotā hai

jahān-e-ishq meñ shor-e-mubārakbād hotā hai

na pūchho kyā surūr-e-lazzat-e-bedād hotā hai

jab āġhosh-e-mohabbat meñ dil-e-nāshād hotā hai

ḳhudā jaane ye kyā dām-e-balā hai gulshan-e-hastī

jidhar parvāz kartā huuñ udhar sayyād hotā hai

ye dars-e-ishq bhī kaisā anokhā daras hai yā-rab

ki jitnā bhūltā jaatā huuñ utnā yaad hotā hai

jo terī yaad meñ girtā hai ban kar gauhar-e-maqsad

vahī ashk-e-mohabbat hāsil-e-rūdād hotā hai

koī shorīda-sar pāband-e-zindāñ ho nahīñ saktā

bagūla apnī zanjīroñ meñ bhī āzād hotā hai

jo 'vahshī' kī tarah hotā hai pāband-e-ġham-e-jānāñ

vahī to bas ġham-e-daurāñ se bhī āzād hotā hai

koi zarra jo dil ki KHak ka barbaad hota hai

jahan-e-ishq mein shor-e-mubarakbaad hota hai

na puchho kya surur-e-lazzat-e-bedad hota hai

jab aaghosh-e-mohabbat mein dil-e-nashad hota hai

KHuda jaane ye kya dam-e-bala hai gulshan-e-hasti

jidhar parwaz karta hun udhar sayyaad hota hai

ye dars-e-ishq bhi kaisa anokha daras hai ya-rab

ki jitna bhulta jata hun utna yaad hota hai

jo teri yaad mein girta hai ban kar gauhar-e-maqsad

wahi ashk-e-mohabbat hasil-e-rudad hota hai

koi shorida-sar paband-e-zindan ho nahin sakta

bagula apni zanjiron mein bhi aazad hota hai

jo 'wahshi' ki tarah hota hai paband-e-gham-e-jaanan

wahi to bas gham-e-dauran se bhi aazad hota hai