kuchh aane walon ki taKHir se tang aa gae hain

kuchh aane vāloñ kī tāḳhīr se tang aa ga.e haiñ

ye ghar tā'mīr-dar-tā'mīr se tang aa ga.e haiñ

ka.ī 'ālam meñ shor uThtā hai is zanjīr-e-pā se

ka.ī 'ālam mirī zanjīr se tang aa ga.e haiñ

to kyā is raaz se siina chhuḌā leñ saañs le leñ

ham is tasvīr meñ tasvīr se tang aa ga.e haiñ

inhīñ farshoñ pe takiya thā magar ye farsh bhī to

hamāre nāla-e-shab-gīr se tang aa ga.e haiñ

machānoñ meñ se aañsū gir rahe haiñ ḳhaak uupar

shikārī haiñ ki jo taqdīr se tang aa ga.e haiñ

'ajab kyā vaqt kā ye āḳhirī pherā ho yaañ par

galī-kūche ab is rahgīr se tang aa ga.e haiñ

vazāhat karte karte zindagī par marte marte

musalsal ek hī tā'zīr se tang aa ga.e haiñ

kuchh aane walon ki taKHir se tang aa gae hain

ye ghar ta'mir-dar-ta'mir se tang aa gae hain

kai 'alam mein shor uThta hai is zanjir-e-pa se

kai 'alam meri zanjir se tang aa gae hain

to kya is raaz se sina chhuDa len sans le len

hum is taswir mein taswir se tang aa gae hain

inhin farshon pe takiya tha magar ye farsh bhi to

hamare nala-e-shab-gir se tang aa gae hain

machanon mein se aansu gir rahe hain KHak upar

shikari hain ki jo taqdir se tang aa gae hain

'ajab kya waqt ka ye aaKHiri phera ho yan par

gali-kuche ab is rahgir se tang aa gae hain

wazahat karte karte zindagi par marte marte

musalsal ek hi ta'zir se tang aa gae hain