kuchh aisa be-sar-o-pa zist ka nizam raha

kuchh aisā be-sar-o-pā ziist kā nizām rahā

ki jo usuul banāyā vo nā-tamām rahā

harīm-e-nāz meñ kuchh aisā ehtimām rahā

uThe hijāb magar shauq tishna-kām rahā

vo kam-nasīb sikandar huuñ maiñ ḳhudā kī panāh

pahuñch ke chashma-e-haivāñ pe tishna-kām rahā

chhupā.e ārzū-e-dil gayā tire dar tak

tavāf-e-ka.aba-e-maqsūd be-marām rahā

agar ho izn-e-taġhāful to aap ġhaur kareñ

na jaane kyoñ mujhe aaj intizār-e-shām rahā

huzūr-e-ishq sazā-vār-e-sad-malāmat hai

vo nā-murād jo ulfat meñ shād-kām rahā

mirī sarisht hī kuchh ḳhūgar-e-asīrī thī

milī qafas se rihā.ī asīr-e-dām rahā

'rashīd' ġhairat-e-rindī hai māna-e-tauba

tamām umr to jām-o-subū se kaam rahā

kuchh aisa be-sar-o-pa zist ka nizam raha

ki jo usul banaya wo na-tamam raha

harim-e-naz mein kuchh aisa ehtimam raha

uThe hijab magar shauq tishna-kaam raha

wo kam-nasib sikandar hun main KHuda ki panah

pahunch ke chashma-e-haiwan pe tishna-kaam raha

chhupae aarzu-e-dil gaya tere dar tak

tawaf-e-kaba-e-maqsud be-maram raha

agar ho izn-e-taghaful to aap ghaur karen

na jaane kyon mujhe aaj intizar-e-sham raha

huzur-e-ishq saza-war-e-sad-malamat hai

wo na-murad jo ulfat mein shad-kaam raha

meri sarisht hi kuchh KHugar-e-asiri thi

mili qafas se rihai asir-e-dam raha

'rashid' ghairat-e-rindi hai mana-e-tauba

tamam umr to jam-o-subu se kaam raha