کچھ ایسا ہے فریب نرگس مستانہ برسوں سے

کچھ ایسا ہے فریب نرگس مستانہ برسوں سے

کہ سب بھولے ہوئے ہیں کعبہ و بت خانہ برسوں سے

نہ اب منصور باقی ہے نہ وہ دار و رسن لیکن

فضا میں گونجتا ہے نعرۂ مستانہ برسوں سے

چمن کے نونہال اس خاک میں پھولیں پھلیں کیسے

یہاں چھایا ہوا ہے سبزۂ بیگانہ برسوں سے

یہ آنکھیں مدتوں سے خوگر برق تجلی ہیں

نشیمن بجلیوں کا ہے مرا کاشانہ برسوں سے

ترے قرباں ادھر بھی ایک جھونکا ابر رحمت کا

جبینوں میں گرہ ہے سجدۂ شکرانہ برسوں سے

سہیلؔ اب کس کو سجدہ کیجیے حیرت کا عالم ہے

جبیں خود بن گئی سنگ در جانانہ برسوں سے