kuchh aisa khel khela zindagi ne

kuchh aisā khel khelā zindagī ne

hamesha duur se dekhā ḳhushī ne

vo mardoñ ke barābar aa rahī thī

phir us ko āzmāyā chhipkalī ne

palaT aa.egā phir sahrā se majnūñ

agar rasta diyā terī galī ne

mohalla ġhībateñ karne lagā hai

kisī kā haath kyā pakḌā kisī ne

kahāñ vo āsmāñ qadmoñ tale thā

kahāñ ab lā girāyā naukrī ne

purāne zaḳhm taaza ho rahe haiñ

ka.ī Tāñke udheḌe haiñ ḳhushī ne

jise ham ne makīn-e-dil banāyā

hamārā dil dukhāyā hai usī ne

ḳhudā-e-arsh ne dekhā zamīñ par

ye kaisā haath maarā mātamī ne

anā kī dhajjiyāñ uḌne lagī haiñ

ḳhudī ko chiir Daalā be-ḳhudī ne

ḳhudā kī qīmateñ lagtī haiñ 'mūsā'

ḳhudā ko bech khānā hai sabhī ne

kuchh aisa khel khela zindagi ne

hamesha dur se dekha KHushi ne

wo mardon ke barabar aa rahi thi

phir us ko aazmaya chhipkali ne

palaT aaega phir sahra se majnun

agar rasta diya teri gali ne

mohalla ghibaten karne laga hai

kisi ka hath kya pakDa kisi ne

kahan wo aasman qadmon tale tha

kahan ab la giraya naukri ne

purane zaKHm taza ho rahe hain

kai Tanke udheDe hain KHushi ne

jise hum ne makin-e-dil banaya

hamara dil dukhaya hai usi ne

KHuda-e-arsh ne dekha zamin par

ye kaisa hath mara matami ne

ana ki dhajjiyan uDne lagi hain

KHudi ko chir Dala be-KHudi ne

KHuda ki qimaten lagti hain 'musa'

KHuda ko bech khana hai sabhi ne