kuchh aise chashm-e-tamanna ko aazmaya gaya

kuchh aise chashm-e-tamannā ko āzmāyā gayā

kisī bhī aks ko puurā nahīñ dikhāyā gayā

darūn-e-ḳhvāb dikhā kar koī hasīñ paikar

hamāre hoñToñ kā masraf hameñ sujhāyā gayā

adhūrā chhoḌ diyā ishq is liye ham ne

hameñ ye kaam mukammal nahīñ sikhāyā gayā

phir is ke baad uTheñge faqat sar-e-mahshar

gar aaj bazm se un kī hameñ uThāyā gayā gayā

matā.a-e-millat-e-ġhaflat-shi.ār luuTī ga.ī

phir is ke baad use niiñd se jagāyā gayā

kabhī ḳhudā kabhī duniyā kabhī mohabbat kā

hamāre dil meñ sadā ḳhauf hī biThāyā gayā

ajab mo.āmla rakkhā zamāne vāloñ ne

jahāñ qayām thā lāzim vahīñ girāyā gayā

daraḳht aaj bhī ham ko duā.eñ dete haiñ

ki jin se naam tumhārā nahīñ miTāyā gayā

vo aaj aa.egī chhat par saheliyoñ ke saath

'qamar' sitāroñ ko laarā ajab lagāyā gayā

kuchh aise chashm-e-tamanna ko aazmaya gaya

kisi bhi aks ko pura nahin dikhaya gaya

darun-e-KHwab dikha kar koi hasin paikar

hamare honTon ka masraf hamein sujhaya gaya

adhura chhoD diya ishq is liye hum ne

hamein ye kaam mukammal nahin sikhaya gaya

phir is ke baad uThenge faqat sar-e-mahshar

gar aaj bazm se un ki hamein uThaya gaya gaya

mataa-e-millat-e-ghaflat-shiar luTi gai

phir is ke baad use nind se jagaya gaya

kabhi KHuda kabhi duniya kabhi mohabbat ka

hamare dil mein sada KHauf hi biThaya gaya

ajab moamla rakkha zamane walon ne

jahan qayam tha lazim wahin giraya gaya

daraKHt aaj bhi hum ko duaen dete hain

ki jin se nam tumhaara nahin miTaya gaya

wo aaj aaegi chhat par saheliyon ke sath

'qamar' sitaron ko lara ajab lagaya gaya