kuchh aise hi tumhaare bin ye dil mera tarasta hai

kuchh aise hī tumhāre bin ye dil merā tarastā hai

khilaunoñ ke liye muflis kā jyuuñ bachcha tarastā hai

ga.e vo din ki jab ye tishnagī fariyād kartī thī

bujhāne ko hamārī pyaas ab dariyā tarastā hai

nafā nuqsān kā jhanjhaT to hotā hai tijārat meñ

mohabbat ho to pītal ke liye sonā tarastā hai

na jaane kab talak hogī mehrbānī ghaTāoñ kī

chaman ke vāste kitnā ye vīrāna tarastā hai

yahī anjām aksar ham ne dekhā hai mohabbat kā

kahīñ rādhā tarastī hai kahīñ kānhā tarastā hai

pata kuchh bhī nahīñ ham ko magar ham sab samajhte haiñ

kisī bastī kī ḳhātir kyoñ vo banjāra tarastā hai

ki āḳhir ai 'akelā' sabr bhī rakkhe kahāñ tak dil

bahut kuchh bolne ko ab to ye gūñgā tarastā hai

kuchh aise hi tumhaare bin ye dil mera tarasta hai

khilaunon ke liye muflis ka jyun bachcha tarasta hai

gae wo din ki jab ye tishnagi fariyaad karti thi

bujhane ko hamari pyas ab dariya tarasta hai

nafa nuqsan ka jhanjhaT to hota hai tijarat mein

mohabbat ho to pital ke liye sona tarasta hai

na jaane kab talak hogi mehrbani ghaTaon ki

chaman ke waste kitna ye virana tarasta hai

yahi anjam aksar hum ne dekha hai mohabbat ka

kahin radha tarasti hai kahin kanha tarasta hai

pata kuchh bhi nahin hum ko magar hum sab samajhte hain

kisi basti ki KHatir kyon wo banjara tarasta hai

ki aaKHir ai 'akela' sabr bhi rakkhe kahan tak dil

bahut kuchh bolne ko ab to ye gunga tarasta hai