کچھ ایسے ہی تمہارے بن یہ دل میرا ترستا ہے

کچھ ایسے ہی تمہارے بن یہ دل میرا ترستا ہے

کھلونوں کے لیے مفلس کا جیوں بچہ ترستا ہے

گئے وہ دن کہ جب یہ تشنگی فریاد کرتی تھی

بجھانے کو ہماری پیاس اب دریا ترستا ہے

نفع نقصان کا جھنجھٹ تو ہوتا ہے تجارت میں

محبت ہو تو پیتل کے لئے سونا ترستا ہے

نہ جانے کب تلک ہوگی مہربانی گھٹاؤں کی

چمن کے واسطے کتنا یہ ویرانہ ترستا ہے

یہی انجام اکثر ہم نے دیکھا ہے محبت کا

کہیں رادھا ترستی ہے کہیں کانہا ترستا ہے

پتہ کچھ بھی نہیں ہم کو مگر ہم سب سمجھتے ہیں

کسی بستی کی خاطر کیوں وہ بنجارہ ترستا ہے

کہ آخر اے اکیلاؔ صبر بھی رکھے کہاں تک دل

بہت کچھ بولنے کو اب تو یہ گونگا ترستا ہے