kuchh aise jazba-e-tahqir se zamana mila

kuchh aise jazba-e-tahqīr se zamāna milā

ki us se apnā ye ḳhuddār dil zarā na milā

bichhaḌ ke rah ga.e ḳhud se jo gum hue us meñ

hazār DhūñDā magar apnā kuchh patā na milā

vo shor kārgah-e-zindagī meñ thā barpā

koī javāb mujhe apnī baat kā na milā

balā kī tez-ḳhirāmī thī har musāfir meñ

adam kī raah meñ koī shikasta-pā na milā

jo log zaat ke jangal meñ rah ga.e ghir kar

unheñ phir us se nikalne kā rāsta na milā

vo baat baat kā TuuTā huā tasalsul thā

ki silsile se yahāñ koī silsila na milā

sharīk-e-hāl rahī mustaqil atā us kī

'zafar' talab se mirī kab mujhe sivā na milā

kuchh aise jazba-e-tahqir se zamana mila

ki us se apna ye KHuddar dil zara na mila

bichhaD ke rah gae KHud se jo gum hue us mein

hazar DhunDa magar apna kuchh pata na mila

wo shor kargah-e-zindagi mein tha barpa

koi jawab mujhe apni baat ka na mila

bala ki tez-KHirami thi har musafir mein

adam ki rah mein koi shikasta-pa na mila

jo log zat ke jangal mein rah gae ghir kar

unhen phir us se nikalne ka rasta na mila

wo baat baat ka TuTa hua tasalsul tha

ki silsile se yahan koi silsila na mila

sharik-e-haal rahi mustaqil ata us ki

'zafar' talab se meri kab mujhe siwa na mila