kuchh aisi TuT ke shahr-e-junun ki yaad aai

kuchh aisī TuuT ke shahr-e-junūñ kī yaad aa.ī

duhā.ī dene lagī aaj merī tanhā.ī

gale milī haiñ ka.ī aa ke dilrubā yādeñ

kahīñ ye ho na tirī shakl-e-yād-farmā.ī

kuchh is qadar the saham-nāk hādsāt-e-hayāt

ki tāb-e-dīd na rakhtī thī merī bīnā.ī

siyah kiye haiñ varaq maiñ ne is tavaqqo.a par

kabhī to hogī mire dard kī pazīrā.ī

badan se rog ne kar lī muvāfiqat shāyad

vahī hai zaḳhm mirā aur vahī hai gahrā.ī

ilaaj DhūñDhtā phirtā huuñ dukh ke nagrī meñ

mirī rasā.ī se bāhar huī masīhā.ī

us ik nazar ne mujhe Dher kar diyā 'shāhid'

kisī bhī kaam na aa.ī mirī tavānā.ī

kuchh aisi TuT ke shahr-e-junun ki yaad aai

duhai dene lagi aaj meri tanhai

gale mili hain kai aa ke dilruba yaaden

kahin ye ho na teri shakl-e-yaad-farmai

kuchh is qadar the saham-nak hadsat-e-hayat

ki tab-e-did na rakhti thi meri binai

siyah kiye hain waraq main ne is tawaqqoa par

kabhi to hogi mere dard ki pazirai

badan se rog ne kar li muwafiqat shayad

wahi hai zaKHm mera aur wahi hai gahrai

ilaj DhunDhta phirta hun dukh ke nagri mein

meri rasai se bahar hui masihai

us ek nazar ne mujhe Dher kar diya 'shahid'

kisi bhi kaam na aai meri tawanai