کچھ اور بڑھ گئی ہے خلش کم نہیں ہوئی

کچھ اور بڑھ گئی ہے خلش کم نہیں ہوئی

اس کی نظر جو بھولے سے برہم نہیں ہوئی

سارے چراغ اپنی تمنا کے بجھ گئے

اک لو ہے تیری یاد کی مدھم نہیں ہوئی

اے حسن غم نواز کوئی تازہ واردات

مدت سے اپنی چشم طلب نم نہیں ہوئی

دامن تمہاری یاد کا چھوٹا نہیں کبھی

یورش غم جہاں کی ادھر کم نہیں ہوئی

دنیا کی کم نگاہی کا شکوہ فضول ہے

جب تیری چشم ناز ہی محرم نہیں ہوئی

وہ زندگی بغیر طلوع سحر رہی

جو زندگی شریک شب غم نہیں ہوئی

اک ہم ہی بے نیاز مسرت رہے نیازؔ

راحت جہاں میں کس کو فراہم نہیں ہوئی