kuchh aur baDh gai hai KHalish kam nahin hui

kuchh aur baḌh ga.ī hai ḳhalish kam nahīñ huī

us kī nazar jo bhūle se barham nahīñ huī

saare charāġh apnī tamanna ke bujh ga.e

ik lau hai terī yaad kī maddham nahīñ huī

ai husn-e-ġham-navāz koī taaza vārdāt

muddat se apnī chashm-e-talab nam nahīñ huī

dāman tumhārī yaad kā chhūTā nahīñ kabhī

yūrish ġham-e-jahāñ kī idhar kam nahīñ huī

duniyā kī kam-nigāhī kā shikva fuzūl hai

jab terī chashm-e-nāz hī mahram nahīñ huī

vo zindagī baġhair tulū-e-sahar rahī

jo zindagī sharīk-e-shab-e-ġham nahīñ huī

ik ham hī be-niyāz-e-masarrat rahe 'niyāz'

rāhat jahāñ meñ kis ko farāham nahīñ huī

kuchh aur baDh gai hai KHalish kam nahin hui

us ki nazar jo bhule se barham nahin hui

sare charagh apni tamanna ke bujh gae

ek lau hai teri yaad ki maddham nahin hui

ai husn-e-gham-nawaz koi taza wardat

muddat se apni chashm-e-talab nam nahin hui

daman tumhaari yaad ka chhuTa nahin kabhi

yurish gham-e-jahan ki idhar kam nahin hui

duniya ki kam-nigahi ka shikwa fuzul hai

jab teri chashm-e-naz hi mahram nahin hui

wo zindagi baghair tulu-e-sahar rahi

jo zindagi sharik-e-shab-e-gham nahin hui

ek hum hi be-niyaz-e-masarrat rahe 'niyaz'

rahat jahan mein kis ko faraham nahin hui