kuchh aur faza nikhre dil aur mahak jae

kuchh aur fazā nikhre dil aur mahak jaa.e

shāne se tirā āñchal ab aur Dhalak jaa.e

be-dīd ho tum behad ab ziist bahak jaa.e

taḳh.īl bhī so jaa.e ehsās bhī thak jaa.e

fitrat bhī tarastī hai ab terī navāzish ko

phir raat mahak jaa.e phir sub.h damak jaa.e

jis ne tujhe paayā thā jis ne tujhe khoyā hai

ab kis kī ināyat se is dil kī kasak jaa.e

ik dil ke sulagne ko ham ishq nahīñ kahte

us samt bhī siine meñ kuchh aag bhaḌak jaa.e

is kūcha-e-rangīñ ke e.ajāz ko kyā kahiye

ik umr bhaTak jaa.e īmān bahak jaa.e

aao ġham-e-duniyā ko andāz-e-tarab de deñ

bhīge hue mausam meñ botal hī khanak jaa.e

īmān-e-mohabbat bhī ik kufr-e-mohabbat hai

har lahza gumāñ guzre har baat pe shak jaa.e

is hijr kī shiddat se ḳhud ishq laraztā hai

dikhte hue shāne par jab zulf Dhalak jaa.e

us jism kā afsāna ham bhī to suneñ 'saifī'

kyoñ tazkira-e-rangīñ aġhyār hī tak jaa.e

kuchh aur faza nikhre dil aur mahak jae

shane se tera aanchal ab aur Dhalak jae

be-did ho tum behad ab zist bahak jae

taKHil bhi so jae ehsas bhi thak jae

fitrat bhi tarasti hai ab teri nawazish ko

phir raat mahak jae phir subh damak jae

jis ne tujhe paya tha jis ne tujhe khoya hai

ab kis ki inayat se is dil ki kasak jae

ek dil ke sulagne ko hum ishq nahin kahte

us samt bhi sine mein kuchh aag bhaDak jae

is kucha-e-rangin ke eajaz ko kya kahiye

ek umr bhaTak jae iman bahak jae

aao gham-e-duniya ko andaz-e-tarab de den

bhige hue mausam mein botal hi khanak jae

iman-e-mohabbat bhi ek kufr-e-mohabbat hai

har lahza guman guzre har baat pe shak jae

is hijr ki shiddat se KHud ishq larazta hai

dikhte hue shane par jab zulf Dhalak jae

us jism ka afsana hum bhi to sunen 'saifi'

kyon tazkira-e-rangin aghyar hi tak jae