kuchh aur gumrahi-e-dil ka raaz kya hoga

kuchh aur gumrahī-e-dil kā raaz kyā hogā

ik ajnabī thā kahīñ rah meñ kho gayā hogā

vo jin kī raat tumhāre hī dam se raushan thī

jo tum vahāñ se ga.e hoge kyā huā hogā

isī ḳhayāl meñ rāteñ ujaḌ ga.iiñ apnī

koī hamārī bhī hālat ko dekhtā hogā

tumhāre dil meñ kahāñ merī yaad kā partav

vo ek halkā sā bādal thā chhaT gayā hogā

vafā na kī na sahī ye bhī yaad hai tujh ko

koī jafā ko bhī tere taras rahā hogā

ġham-e-judā.ī meñ aisī kahāñ thī lazzat-e-dard

unheñ bhī mujh se bichhaḌne kā dukh huā hogā

kuchh aur gumrahi-e-dil ka raaz kya hoga

ek ajnabi tha kahin rah mein kho gaya hoga

wo jin ki raat tumhaare hi dam se raushan thi

jo tum wahan se gae hoge kya hua hoga

isi KHayal mein raaten ujaD gain apni

koi hamari bhi haalat ko dekhta hoga

tumhaare dil mein kahan meri yaad ka partaw

wo ek halka sa baadal tha chhaT gaya hoga

wafa na ki na sahi ye bhi yaad hai tujh ko

koi jafa ko bhi tere taras raha hoga

gham-e-judai mein aisi kahan thi lazzat-e-dard

unhen bhi mujh se bichhaDne ka dukh hua hoga