kuchh aur hai mujhko gham-e-dauran to nahin hai

kuchh aur hai mujh ko ġham-e-daurāñ to nahīñ hai

muztar hai dil-e-shauq pareshāñ to nahīñ hai

luTne kī tamanna hai mire gauhar-e-dil meñ

muflis to nahīñ be-sar-o-sāmāñ to nahīñ hai

kal hogī qayāmat vo yaqīñ bhī nahīñ kartā

zālim koī kāfir hai musalmāñ to nahīñ hai

kyā hai jo khaTaktā hai barābar mire dil meñ

mujh par nigah-e-nāz kā ehsāñ to nahīñ hai

uThtā hai jo sho.ala sā mire qalb-o-jigar meñ

barq-e-sharaf-e-tūr farozāñ to nahīñ hai

'rāzī' ko ijāzat nahīñ kyoñ bazm-e-tarab meñ

ye aap kī mahfil hai shabistāñ to nahīñ hai

kuchh aur hai mujh ko gham-e-dauran to nahin hai

muztar hai dil-e-shauq pareshan to nahin hai

luTne ki tamanna hai mere gauhar-e-dil mein

muflis to nahin be-sar-o-saman to nahin hai

kal hogi qayamat wo yaqin bhi nahin karta

zalim koi kafir hai musalman to nahin hai

kya hai jo khaTakta hai barabar mere dil mein

mujh par nigah-e-naz ka ehsan to nahin hai

uThta hai jo shoala sa mere qalb-o-jigar mein

barq-e-sharaf-e-tur farozan to nahin hai

'raazi' ko ijazat nahin kyon bazm-e-tarab mein

ye aap ki mahfil hai shabistan to nahin hai