kuchh aur to nahin hamein is ka ojab hai ab

kuchh aur to nahīñ hameñ is kā ojab hai ab

ya.anī vo shoḳh ham se ḳhafā be-sabab hai ab

āh-o-fuġhān-o-girya-o-andoh o dard o daaġh

jo jins-e-ishq hai vo mire paas sab hai ab

dekhe se jis ke ġhuncha-sifat gul ho rashk hai

aisā to is janam meñ vahī ġhuncha-lab hai ab

sub.h-e-falak bhī jis kī tajallī se ho ḳhajil

us rashk-e-māhtāb se apnī vo shab hai ab

ā.īna ek dam nahīñ rakhtā hai haath se

aisā vo apne ruḳh kā tamāshā-talab hai ab

us gul-badan ke vasl se har dam 'nazīr' ko

sab se ziyāda ḳhalq meñ aish-o-tarab hai ab

kuchh aur to nahin hamein is ka ojab hai ab

yani wo shoKH hum se KHafa be-sabab hai ab

aah-o-fughan-o-girya-o-andoh o dard o dagh

jo jins-e-ishq hai wo mere pas sab hai ab

dekhe se jis ke ghuncha-sifat gul ho rashk hai

aisa to is janam mein wahi ghuncha-lab hai ab

subh-e-falak bhi jis ki tajalli se ho KHajil

us rashk-e-mahtab se apni wo shab hai ab

aaina ek dam nahin rakhta hai hath se

aisa wo apne ruKH ka tamasha-talab hai ab

us gul-badan ke wasl se har dam 'nazir' ko

sab se ziyaada KHalq mein aish-o-tarab hai ab