kuchh baat hai mila jo wafadar ki tarah

kuchh baat hai milā jo vafādār kī tarah

ik bā-usūl-o-sāhab-e-kirdār kī tarah

aa.ī bahār bhī to adākār kī tarah

hai surḳh phuul dīda-e-ḳhūñbār kī tarah

bedār har taraf haiñ tashaddud kī āñdhiyāñ

iḳhlās mahv-e-ḳhvāb hai bīmār kī tarah

gir gir ke bijliyāñ bhī pareshān ho ga.iiñ

maskan khaḌā hai aaj bhī kohsār kī tarah

dariyā ke do kināroñ kā mumkin na thā visāl

maujeñ khaḌī thiiñ raah meñ dīvār kī tarah

terā karam bhī ek sitam hai mire liye

laTkā hai sar pe mere vo talvār kī tarah

'āqil' miyāñ ye ahl-e-siyāsat kā daur hai

milte haiñ ab to yaar bhī aġhyār kī tarah

kuchh baat hai mila jo wafadar ki tarah

ek ba-usul-o-sahab-e-kirdar ki tarah

aai bahaar bhi to adakar ki tarah

hai surKH phul dida-e-KHunbar ki tarah

bedar har taraf hain tashaddud ki aandhiyan

iKHlas mahw-e-KHwab hai bimar ki tarah

gir gir ke bijliyan bhi pareshan ho gain

maskan khaDa hai aaj bhi kohsar ki tarah

dariya ke do kinaron ka mumkin na tha visal

maujen khaDi thin rah mein diwar ki tarah

tera karam bhi ek sitam hai mere liye

laTka hai sar pe mere wo talwar ki tarah

'aqil' miyan ye ahl-e-siyasat ka daur hai

milte hain ab to yar bhi aghyar ki tarah