kuchh bacha le abhi aansu mujhe rone wale

kuchh bachā le abhī aañsū mujhe rone vaale

sānehe aur bhī haiñ rū-numā hone vaale

vaqt ke ghaaT utar kar nahīñ vāpas lauTe

daaġh malbūs-e-mah-o-mahr ke dhone vaale

daa.em ābād rahe dār-e-fanā ke baasī

fikr meñ rūh-e-baqāyāb samone vaale

thartharātī rahe ab ḳhvāh hama-vaqt zamīñ

so ga.e ḳhāk-e-abad oḌh ke sone vaale

jis pe bhī paañv dharā maiñ ne usī naav meñ

aa.e āsār nazar ḳhud ko Dubone vaale

ab liye phirtā hai kyā dāman-e-sad-chāk apnā

kyā hue ab vo tire siine pirone vaale

jā nikaltā hai achānak vahīñ rasta merā

dar pa-e-pā hoñ jahāñ ḳhaar chubhone vaale

gard hai haath meñ un ke mirī kisht-e-zar-ḳhez

ḳhār-o-ḳhas se jo 'alāva nahīñ bone vaale

ye bhī ik turfa tamāsha hai ki haiñ añdhiyāre

resha-e-shab meñ sitāroñ ko pirone vaale

kar ga.e ḳhushk bharī jhiil ta.assuf ke kañval

suukh kar kāñTā hue raat bhigone vaale

de gayā hai jo hameñ ahd-e-marāsim us kā

us ḳhazāne ko nahīñ ham nahīñ khone vaale

kuchh bacha le abhi aansu mujhe rone wale

sanehe aur bhi hain ru-numa hone wale

waqt ke ghaT utar kar nahin wapas lauTe

dagh malbus-e-mah-o-mahr ke dhone wale

daem aabaad rahe dar-e-fana ke basi

fikr mein ruh-e-baqayab samone wale

thartharaati rahe ab KHwah hama-waqt zamin

so gae KHak-e-abad oDh ke sone wale

jis pe bhi panw dhara main ne usi naw mein

aae aasar nazar KHud ko Dubone wale

ab liye phirta hai kya daman-e-sad-chaak apna

kya hue ab wo tere sine pirone wale

ja nikalta hai achanak wahin rasta mera

dar pa-e-pa hon jahan KHar chubhone wale

gard hai hath mein un ke meri kisht-e-zar-KHez

KHar-o-KHas se jo 'alawa nahin bone wale

ye bhi ek turfa tamasha hai ki hain andhiyare

resha-e-shab mein sitaron ko pirone wale

kar gae KHushk bhari jhil tassuf ke kanwal

sukh kar kanTa hue raat bhigone wale

de gaya hai jo hamein ahd-e-marasim us ka

us KHazane ko nahin hum nahin khone wale