kuchh bhi aaj bhi tauqir-e-wafa hai to sahi

kuchh bhī aaj bhī tauqīr-e-vafā hai to sahī

kam hai yā besh hai is baat se kyā hai to sahī

dair kī sair bhī kī sair-e-haram bhī kar lī

dekhnā kyā dar-e-mai-ḳhāna hai vā hai to sahī

lab pe rindoñ ke haiñ allāh ko sau salvāteñ

na sahī ḳhauf-e-ḳhudā zikr-e-ḳhudā hai to sahī

jis se duniyā ko na kuchh kaam na duniyā se jise

vo bhalā hai to sahī aur burā hai to sahī

soch kar kahne lagā ye maraz-e-ġham kā tabīb

kyā likhūñ is kī davā ek davā hai to sahī

koī gumrāh mirī sust-ravī par na hañse

na sahī tāqat-e-pā rāh-numā hai to sahī

imtihān-e-sho’arā bazm-e-suḳhan meñ tauba

kaisī rakkhī hai radīf aur sunā hai to sahī

fursat-e-she’r-o-suḳhan 'amn' ko kam hai lekin

she'r-goī kā abhī hausla sā hai to sahī

kuchh bhi aaj bhi tauqir-e-wafa hai to sahi

kam hai ya besh hai is baat se kya hai to sahi

dair ki sair bhi ki sair-e-haram bhi kar li

dekhna kya dar-e-mai-KHana hai wa hai to sahi

lab pe rindon ke hain allah ko sau salwaten

na sahi KHauf-e-KHuda zikr-e-KHuda hai to sahi

jis se duniya ko na kuchh kaam na duniya se jise

wo bhala hai to sahi aur bura hai to sahi

soch kar kahne laga ye maraz-e-gham ka tabib

kya likhun is ki dawa ek dawa hai to sahi

koi gumrah meri sust-rawi par na hanse

na sahi taqat-e-pa rah-numa hai to sahi

imtihan-e-sho’ara bazm-e-suKHan mein tauba

kaisi rakkhi hai radif aur suna hai to sahi

fursat-e-she’r-o-suKHan 'amn' ko kam hai lekin

she'r-goi ka abhi hausla sa hai to sahi