kuchh bhi ho pesh-e-nazar jata hun main

kuchh bhī ho pesh-e-nazar jaatā huuñ maiñ

yaar hai to hukm kar jaatā huuñ meñ

mujh ko kaalī koTharī kī qaid hai

raushnī hote hī Dar jaatā huuñ maiñ

saarā din chaltā hai mujh meñ ik hujūm

shaam hote hī bikhar jaatā huuñ maiñ

ḳhush-mizājī bāñdh mere zaḳhm par

tere hote chashm-e-tar jaatā huuñ maiñ

hādisa hote hī ghaTtā hai vajūd

jāniye ab kis qadar jaatā huuñ maiñ

rang ukhḌe haiñ mirī tasvīr ke

ab kisī zangār par jaatā huuñ maiñ

surma.ī āvāz aatī hai mujhe

aur chhat par bhaag kar jaatā huuñ maiñ

raat bhar chaltī hai ab apnī tarāsh

sub.h tak malbe se bhar jaatā huuñ maiñ

roz kartā huuñ nayā kār-e-junūñ

roz ḳhālī haath ghar jaatā huuñ maiñ

āsmāñ se rizq aatā hai mujhe

bas kahīñ kashkol dhar jaatā huuñ maiñ

tujh ko ruknā hai to ruk jā chhāñv meñ

merā hai lambā safar jaatā huuñ maiñ

kaj-suḳhan logoñ kī ujlat dekhiye

sar ke uupar se guzar jaatā huuñ maiñ

maiñ ne 'rāshid' khā liyā ḳhauf-e-ḳhudā

dekhiye bachtā huuñ mar jaatā huuñ maiñ

kuchh bhi ho pesh-e-nazar jata hun main

yar hai to hukm kar jata hun mein

mujh ko kali koThari ki qaid hai

raushni hote hi Dar jata hun main

sara din chalta hai mujh mein ek hujum

sham hote hi bikhar jata hun main

KHush-mizaji bandh mere zaKHm par

tere hote chashm-e-tar jata hun main

hadisa hote hi ghaTta hai wajud

jaaniye ab kis qadar jata hun main

rang ukhDe hain meri taswir ke

ab kisi zangar par jata hun main

surmai aawaz aati hai mujhe

aur chhat par bhag kar jata hun main

raat bhar chalti hai ab apni tarash

subh tak malbe se bhar jata hun main

roz karta hun naya kar-e-junun

roz KHali hath ghar jata hun main

aasman se rizq aata hai mujhe

bas kahin kashkol dhar jata hun main

tujh ko rukna hai to ruk ja chhanw mein

mera hai lamba safar jata hun main

kaj-suKHan logon ki ujlat dekhiye

sar ke upar se guzar jata hun main

main ne 'rashid' kha liya KHauf-e-KHuda

dekhiye bachta hun mar jata hun main