کچھ بھی جو اثاثہ در و دیوار میں ہوتا

کچھ بھی جو اثاثہ در و دیوار میں ہوتا

گلیوں میں نہیں گھر مرا بازار میں ہوتا

ماتم ہی الگ شہر عزادار میں ہوتا

مجھ سا جو کلیجہ کہیں دو چار میں ہوتا

پھر شاہ نے بیعت ہی طلب کی نہیں ورنہ

جو رن میں ہوا تھا وہی دربار میں ہوتا

جس سے میں گلا کاٹ سکوں اپنی انا کا

اے کاش وہ لوہا مری تلوار میں ہوتا

ہوتا ہی نہیں زخم جو بھرنے سے ہو قاصر

ہوتا تو مرے حلقۂ آزار میں ہوتا

اک مرغ تمنا لب اغیار پہ ہوتی

اک حرف دعا کا دل غم خوار میں ہوتا

آنکھوں میں اجالا لب و رخسار میں خوشبو

اک دل بھی کہیں سینۂ دل دار میں ہوتا