kuchh bhi kar lijiye wo waza badalne ke nahin

kuchh bhī kar lījiye vo vaz.a badalne ke nahīñ

ya.anī ham karb-o-aziyyat se nikalne ke nahīñ

ham bhale kūcha-e-vīrāñ meñ akele bhaTkeñ

is zamāne kī ravish par kabhī chalne ke nahīñ

aa.ina hai hameñ jab tak tirī ḳhandāñ sūrat

ham kisī rañj kī tasvīr meñ Dhalne ke nahīñ

haañ kabhī soz-e-darūñ un ko ghulā de shāyad

varna nāloñ se hamāre vo pighalne ke nahīñ

ho chuke ḳhaak jo jal kar vo patañge ai sham.a

dūsrī baar tire sho.ale se jalne ke nahīñ

sehn-e-dil meñ jo lagā.e the tamannā ke shajar

aisā lagtā hai vo imsāl bhī phalne ke nahīñ

jab talak manzil-e-ulfat pe nazar hai 'kāshif'

paañv apne kisī Tiile se phisalne ke nahīñ

kuchh bhi kar lijiye wo waza badalne ke nahin

yani hum karb-o-aziyyat se nikalne ke nahin

hum bhale kucha-e-viran mein akele bhaTken

is zamane ki rawish par kabhi chalne ke nahin

aaina hai hamein jab tak teri KHandan surat

hum kisi ranj ki taswir mein Dhalne ke nahin

han kabhi soz-e-darun un ko ghula de shayad

warna nalon se hamare wo pighalne ke nahin

ho chuke KHak jo jal kar wo patange ai shama

dusri bar tere shoale se jalne ke nahin

sehn-e-dil mein jo lagae the tamanna ke shajar

aisa lagta hai wo imsal bhi phalne ke nahin

jab talak manzil-e-ulfat pe nazar hai 'kashif'

panw apne kisi Tile se phisalne ke nahin