kuchh bhi miyan-e-dud dikhai nahin diya

kuchh bhī miyān-e-dūd dikhā.ī nahīñ diyā

hākim tujhe jumūd dikhā.ī nahīñ diyā

aayā ḳhayāl 'mīr' 'taqī' 'mīr' kā mujhe

apnā kahīñ vajūd dikhā.ī nahīñ diyā

tahrīk mere jazboñ ko is se mile sadā

kyoñ jalva-e-hasūd dikhā.ī nahīñ diyā

badlā sabhī ne rañg to ye bhī badal gayā

charḳh-e-kuhan kabūd dikhā.ī nahīñ diyā

sab fāsle ubuur nigāhoñ ne kar liye

chāroñ taraf umuud dikhā.ī nahīñ diyā

dushman kī saf meñ jis se mache khalbalī sadā

vo manzar-e-sujūd dikhā.ī nahīñ diyā

har shai guzar rahī hai taġhayyur se dosto

kuchh bhī to be-numūd dikhā.ī nahīñ diyā

maiñ jis ke ās-pās rahā umr bhar 'valī'

us ko mirā vajūd dikhā.ī nahīñ diyā

kuchh bhi miyan-e-dud dikhai nahin diya

hakim tujhe jumud dikhai nahin diya

aaya KHayal 'mir' 'taqi' 'mir' ka mujhe

apna kahin wajud dikhai nahin diya

tahrik mere jazbon ko is se mile sada

kyon jalwa-e-hasud dikhai nahin diya

badla sabhi ne rang to ye bhi badal gaya

charKH-e-kuhan kabud dikhai nahin diya

sab fasle ubur nigahon ne kar liye

chaaron taraf umud dikhai nahin diya

dushman ki saf mein jis se mache khalbali sada

wo manzar-e-sujud dikhai nahin diya

har shai guzar rahi hai taghayyur se dosto

kuchh bhi to be-numud dikhai nahin diya

main jis ke aas-pas raha umr bhar 'wali'

us ko mera wajud dikhai nahin diya