کچھ بھی نہیں ہے کیا پس دیوار دیکھنا

کچھ بھی نہیں ہے کیا پس دیوار دیکھنا

سائے کو ڈوبتے ہوئے ہر بار دیکھنا

عورت ہوں میری ماں نے سکھایا کہ عمر بھر

آئینہ بن کے آئنہ بردار دیکھنا

یہ سوچ کر ہی میں نے جلایا نہیں چراغ

کیا روشنی کو برسر پیکار دیکھنا

میں تو چراغ شب تھی چلو بجھ گئی مگر

تم تو سحر کے خیر سے آثار دیکھنا

جب اعتبار دیدۂ دل اٹھ گیا تو پھر

کیا رہ گیا ہے یار طرح دار دیکھنا

زریابؔ کیا خریدنے نکلی ہو دھوپ میں

کیا گرمیوں میں گرمئ بازار دیکھنا