kuchh bhi to yahan hasb-e-maraatib nahin lagta

kuchh bhī to yahāñ hasb-e-marātib nahīñ lagtā

aur shikva-e-hālāt munāsib nahīñ lagtā

kyoñ us se kaheñ kuchh ki jo sun ke bhī rahe chup

aisā to muḳhātib bhī muḳhātib nahīñ lagtā

aatā bhī nahīñ sāmne kartā bhī nahīñ baat

mahbūb kahāñ vo to musāhib nahīñ lagtā

iblīs churā laayā hai kyā lauh-o-qalam bhī

vo mālik-e-taqdīr ye kātib nahīñ lagtā

insān se insāñ kā ta.āruf bhī nahīñ hai

sūrat se koī sādiq-o-kāzib nahīñ lagtā

shar jiit gayā haar gayā ḳhair yahāñ bhī

dil ab to mohabbat kā bhī tālib nahīñ lagtā

jis dard kī duniyā meñ davā.eñ nahīñ miltīñ

us dard kā iz.hār munāsib nahīñ lagtā

kuchh bhi to yahan hasb-e-maraatib nahin lagta

aur shikwa-e-haalat munasib nahin lagta

kyon us se kahen kuchh ki jo sun ke bhi rahe chup

aisa to muKHatib bhi muKHatib nahin lagta

aata bhi nahin samne karta bhi nahin baat

mahbub kahan wo to musahib nahin lagta

iblis chura laya hai kya lauh-o-qalam bhi

wo malik-e-taqdir ye katib nahin lagta

insan se insan ka taaruf bhi nahin hai

surat se koi sadiq-o-kazib nahin lagta

shar jit gaya haar gaya KHair yahan bhi

dil ab to mohabbat ka bhi talib nahin lagta

jis dard ki duniya mein dawaen nahin miltin

us dard ka izhaar munasib nahin lagta