kuchh dard baDha hai to mudawa bhi hua hai

kuchh dard baḌhā hai to mudāvā bhī huā hai

har-sū dil-e-betāb kā charchā bhī huā hai

purze bhī uḌe haiñ mirī vahshat ke sar-e-rāh

nazroñ meñ hamārī ye tamāshā bhī huā hai

phūTe haiñ kahīñ aah bhare dil ke phaphole

pāmāl koī shahr-e-tamannā bhī huā hai

maanā ki kaḌī dhuup meñ saa.e bhī mile haiñ

is raah meñ har moḌ pe dhokā bhī huā hai

raushan to hai yaḳh-basta fazāoñ meñ koī aag

tārīkī-e-zindāñ meñ ujālā bhī huā hai

har lamha koī hādisa roke hai mire paañv

har pal kisī ḳhvāhish kā taqāzā bhī huā hai

kis moḌ pe aa pahuñchā hai 'shāhid' ye zamāna

raftār qayāmat kī hai Thahrā bhī huā hai

kuchh dard baDha hai to mudawa bhi hua hai

har-su dil-e-betab ka charcha bhi hua hai

purze bhi uDe hain meri wahshat ke sar-e-rah

nazron mein hamari ye tamasha bhi hua hai

phuTe hain kahin aah bhare dil ke phaphole

pamal koi shahr-e-tamanna bhi hua hai

mana ki kaDi dhup mein sae bhi mile hain

is rah mein har moD pe dhoka bhi hua hai

raushan to hai yaKH-basta fazaon mein koi aag

tariki-e-zindan mein ujala bhi hua hai

har lamha koi hadisa roke hai mere panw

har pal kisi KHwahish ka taqaza bhi hua hai

kis moD pe aa pahuncha hai 'shahid' ye zamana

raftar qayamat ki hai Thahra bhi hua hai