kuchh dil ka talluq to nibhao ki chala main

kuchh dil kā ta.alluq to nibhāo ki chalā maiñ

yā TuuT ke āvāz lagāo ki chalā maiñ

darpesh masāfat hai kisī ḳhvāb-nagar kī

ik diip mire paas jalāo ki chalā maiñ

is shahr ke logoñ pe bharosā nahīñ karnā

zanjīr koī dar pe lagāo ki chalā maiñ

tā-dil meñ tumhāre bhī na ehsās-e-vafā ho

jī bhar ke mujhe aaj satāo ki chalā maiñ

mushtāq nigāhoñ se ye sehr TuuT rahā hai

chehre pe koī rañg sajāo ki chalā maiñ

is shahr-e-marāsim meñ to sañgsār huā huuñ

patthar hī sar-e-rāh sajāo ki chalā maiñ

is tishna-labī par mujhe ezaaz to baḳhsho

ai bāda-kasho jaam uThāo ki chalā maiñ

is darja taġhāful kī nahīñ taab jigar ko

tum aur bahāne na banāo ki chalā maiñ

ik ḳhvāb hai vo ḳhvāb to puurā karo 'sāhil'

ik sher mirā mujh ko sunāo ki chalā maiñ

kuchh dil ka talluq to nibhao ki chala main

ya TuT ke aawaz lagao ki chala main

darpesh masafat hai kisi KHwab-nagar ki

ek dip mere pas jalao ki chala main

is shahr ke logon pe bharosa nahin karna

zanjir koi dar pe lagao ki chala main

ta-dil mein tumhaare bhi na ehsas-e-wafa ho

ji bhar ke mujhe aaj satao ki chala main

mushtaq nigahon se ye sehr TuT raha hai

chehre pe koi rang sajao ki chala main

is shahr-e-marasim mein to sangsar hua hun

patthar hi sar-e-rah sajao ki chala main

is tishna-labi par mujhe ezaz to baKHsho

ai baada-kasho jam uThao ki chala main

is darja taghaful ki nahin tab jigar ko

tum aur bahane na banao ki chala main

ek KHwab hai wo KHwab to pura karo 'sahil'

ek sher mera mujh ko sunao ki chala main