kuchh dinon se jo tabiat meri yaksu kam hai

kuchh dinoñ se jo tabī.at mirī yaksū kam hai

dil hai bhar-pūr magar aañkh meñ aañsū kam hai

tujhe ghere meñ liye rakhte haiñ kuchh aur hī log

yaanī tere liye ye halqa-e-bāzū kam hai

toḌ jaise hai koī apne hī andar is kā

varna aisā bhī nahīñ hai tirā jaadū kam hai

maiñ in āfāt-e-samāvī pe karūñ kyuuñ takiya

kyā mirī saarī tabāhī ke liye tū kam hai

rañg-e-mausam hī mohabbat kā diyā jis ne bigāḌ

shahr bhar ke liye kyā ek hī bad-ḳhū kam hai

peḌ kī chhāñv pe kartī hai qanā.at kyuuñ ḳhalq

aur kyuuñ sab ke liye sāya-e-gesū kam hai

zindagī hai vahī sad-rañg mire chāroñ taraf

kuchh dinoñ se magar is kā koī pahlū kam hai

vo bhī jaane se havā phirtā hai bāhar aur kuchh

dil pe apnā bhī ka.ī roz se qaabū kam hai

shā.irī chhoḌ bhī saktā nahīñ maiñ varna 'zafar'

jāntā huuñ is añdhere meñ ye jugnū kam hai

kuchh dinon se jo tabiat meri yaksu kam hai

dil hai bhar-pur magar aankh mein aansu kam hai

tujhe ghere mein liye rakhte hain kuchh aur hi log

yani tere liye ye halqa-e-bazu kam hai

toD jaise hai koi apne hi andar is ka

warna aisa bhi nahin hai tera jadu kam hai

main in aafat-e-samawi pe karun kyun takiya

kya meri sari tabahi ke liye tu kam hai

rang-e-mausam hi mohabbat ka diya jis ne bigaD

shahr bhar ke liye kya ek hi bad-KHu kam hai

peD ki chhanw pe karti hai qanaat kyun KHalq

aur kyun sab ke liye saya-e-gesu kam hai

zindagi hai wahi sad-rang mere chaaron taraf

kuchh dinon se magar is ka koi pahlu kam hai

wo bhi jaane se hawa phirta hai bahar aur kuchh

dil pe apna bhi kai roz se qabu kam hai

shairi chhoD bhi sakta nahin main warna 'zafar'

jaanta hun is andhere mein ye jugnu kam hai