کچھ اعتماد کا لہجہ بھی فکر و فن سے ملا

کچھ اعتماد کا لہجہ بھی فکر و فن سے ملا

یہ سلسلہ تو مجھے میرؔ کے سخن سے ملا

بکھر بکھر کے میں سمٹا ہوں ایک مرکز پر

یہ حوصلہ تو مجھے تیرے حسن ظن سے ملا

عجیب طور سے تو نے صدا لگائی تھی

بس ایک کرب مسلسل ترے سخن سے ملا

ترا خیال مجھے دستکیں تو دیتا تھا

ترا پتا مجھے خوشبوئے پیرہن سے ملا

میں بجھ گیا تھا سواد دیار ظلمت میں

چراغ راہ تو امید کی کرن سے ملا

بھٹک رہا تھا مجیدیؔ شب جدائی میں

چراغ زیست مجھے حسن گل بدن سے ملا