kuchh etimad ka lahja bhi fikr-o-fan se mila

kuchh e'timād kā lahja bhī fikr-o-fan se milā

ye silsila to mujhe 'mīr' ke suḳhan se milā

bikhar bikhar ke maiñ simTā huuñ ek markaz par

ye hausla to mujhe tere husn-e-zan se milā

ajiib taur se tū ne sadā lagā.ī thī

bas ek karb-e-musalsal tire suḳhan se milā

tirā ḳhayāl mujhe dastakeñ to detā thā

tirā patā mujhe ḳhushbū-e-pairahan se milā

maiñ bujh gayā thā savād-e-dayār-e-zulmat meñ

charāġh-e-rāh to ummīd kī kiran se milā

bhaTak rahā thā 'majīdī' shab-e-judā.ī meñ

charāġh-e-zīst mujhe husn-e-gul-badan se milā

kuchh e'timad ka lahja bhi fikr-o-fan se mila

ye silsila to mujhe 'mir' ke suKHan se mila

bikhar bikhar ke main simTa hun ek markaz par

ye hausla to mujhe tere husn-e-zan se mila

ajib taur se tu ne sada lagai thi

bas ek karb-e-musalsal tere suKHan se mila

tera KHayal mujhe dastaken to deta tha

tera pata mujhe KHushbu-e-pairahan se mila

main bujh gaya tha sawad-e-dayar-e-zulmat mein

charagh-e-rah to ummid ki kiran se mila

bhaTak raha tha 'majidi' shab-e-judai mein

charagh-e-zist mujhe husn-e-gul-badan se mila