kuchh ehtimam na tha sham-e-gham manane ko

kuchh ehtimām na thā shām-e-ġham manāne ko

havā ko bhej diyā hai charāġh laane ko

hamāre ḳhvāb salāmat raheñ tumhāre saath

ye baat kaafī hai duniyā kī niiñd uḌāne ko

hamārā ḳhuun kisī kaam kā nahīñ bhaa.ī

ye paanī Thiik hai lekin diye jalāne ko

hamārī raakh yūñhī to nahīñ kuredte log

hamāre paas koī baat hai chhupāne ko

tire baġhair bhī ham jī rahe haiñ aur ḳhush haiñ

ye baat kam to nahīñ hai tujhe jalāne ko

hamāre ḳhuun se luThḌe hue haiñ haath us ke

hamāre saath mohabbat bhī hai zamāne ko

vo jin ke paas koī aks bhī nahīñ 'āmī'

taḌap rahe haiñ mujhe ā.īna dikhāne ko

kuchh ehtimam na tha sham-e-gham manane ko

hawa ko bhej diya hai charagh lane ko

hamare KHwab salamat rahen tumhaare sath

ye baat kafi hai duniya ki nind uDane ko

hamara KHun kisi kaam ka nahin bhai

ye pani Thik hai lekin diye jalane ko

hamari rakh yunhi to nahin kuredte log

hamare pas koi baat hai chhupane ko

tere baghair bhi hum ji rahe hain aur KHush hain

ye baat kam to nahin hai tujhe jalane ko

hamare KHun se luThDe hue hain hath us ke

hamare sath mohabbat bhi hai zamane ko

wo jin ke pas koi aks bhi nahin 'ami'

taDap rahe hain mujhe aaina dikhane ko