kuchh ek main hi nahin tera jaan-e-jaan mushtaq

kuchh ek maiñ hī nahīñ terā jān-e-jāñ mushtāq

hai terī diid kā muddat se ik jahāñ mushtāq

sagān-e-kūcha-e-dilbar kā ai humā kab se

hai jism meñ mire har ek ustuḳhvāñ mushtāq

tum ishtiyāq meñ us ko paḌā hī rahne do

tumhārā chhoḌ ke dar jaave ye kahāñ mushtāq

ḳhudā ke vāste ruḳh se naqāb ko ulTo

ki kar rahe haiñ bahut der se fuġhāñ mushtāq

haram meñ dair meñ dasht-o-chaman meñ milte nahīñ

kareñ talāsh batāo tumheñ kahāñ mushtāq

kuñ.eñ jhukāo na un ko zarā dikhāo jamāl

tumhārā ġhairat-e-yūsuf hai kārvāñ mushtāq

dikhāoge tum agar kākul-e-musalsal ko

hamāre paañv kī hoveñgī beḌiyāñ mushtāq

ravish pe baaġh meñ tan ke to chal zarā lab-e-jū

huī haiñ sarv-e-ravāñ terī qumriyāñ mushtāq

ishāroñ se hai tire abrū-o-mizha ke ayaañ

shikār ke liye haiñ tiir aur kamāñ mushtāq

dil-e-visāl meñ ho kyoñ na intizār-e-firāq

bahār kī bhī sadā rahtī hai ḳhizāñ mushtāq

hamārā sar tire 'ḳhanjar' ke vaar kā qātil

hai ārzū-e-shahādat meñ har-zamāñ mushtāq

kuchh ek main hi nahin tera jaan-e-jaan mushtaq

hai teri did ka muddat se ek jahan mushtaq

sagan-e-kucha-e-dilbar ka ai huma kab se

hai jism mein mere har ek ustuKHwan mushtaq

tum ishtiyaq mein us ko paDa hi rahne do

tumhaara chhoD ke dar jawe ye kahan mushtaq

KHuda ke waste ruKH se naqab ko ulTo

ki kar rahe hain bahut der se fughan mushtaq

haram mein dair mein dasht-o-chaman mein milte nahin

karen talash batao tumhein kahan mushtaq

kunen jhukao na un ko zara dikhao jamal

tumhaara ghairat-e-yusuf hai karwan mushtaq

dikhaoge tum agar kakul-e-musalsal ko

hamare panw ki howengi beDiyan mushtaq

rawish pe bagh mein tan ke to chal zara lab-e-ju

hui hain sarw-e-rawan teri qumriyan mushtaq

ishaaron se hai tere abru-o-mizha ke ayan

shikar ke liye hain tir aur kaman mushtaq

dil-e-visal mein ho kyon na intizar-e-firaq

bahaar ki bhi sada rahti hai KHizan mushtaq

hamara sar tere 'KHanjar' ke war ka qatil

hai aarzu-e-shahadat mein har-zaman mushtaq