kuchh gardish-e-zamana kuchh aarzu kare hai

kuchh gardish-e-zamāna kuchh aarzū kare hai

baaqī jo bach rahe hai vo kaam tū kare hai

ḳhūn-e-jigar kare hai dil ko lahū kare hai

ye daur aadmī ko yuuñ surḳh-rū kare hai

motī hai ye palak par ruḳhsār par hai shabnam

gir kar zamīñ pe aañsū be-ābrū kare hai

zindāñ kī dil-shikasta tanhā.iyoñ meñ koī

dīvār-o-dar se jaane kyā guftugū kare hai

har zarra mai-kada hai ye tishnagī salāmat

kyuuñ mātam-e-shikast-e-jām-o-subū kare hai

kuchh mo'tabar nahīñ hai asvad ho yā ki marmar

in pattharoñ ke aage kyā aarzū kare hai

kab kā guzar chukā hai dīvāngī kā aalam

phir bhī 'majāz' apnā dāman rafū kare hai

kuchh gardish-e-zamana kuchh aarzu kare hai

baqi jo bach rahe hai wo kaam tu kare hai

KHun-e-jigar kare hai dil ko lahu kare hai

ye daur aadmi ko yun surKH-ru kare hai

moti hai ye palak par ruKHsar par hai shabnam

gir kar zamin pe aansu be-abru kare hai

zindan ki dil-shikasta tanhaiyon mein koi

diwar-o-dar se jaane kya guftugu kare hai

har zarra mai-kada hai ye tishnagi salamat

kyun matam-e-shikast-e-jam-o-subu kare hai

kuchh mo'tabar nahin hai aswad ho ya ki marmar

in pattharon ke aage kya aarzu kare hai

kab ka guzar chuka hai diwangi ka aalam

phir bhi 'majaz' apna daman rafu kare hai