kuchh gunah nahin is mein etiraf hi kar lo

kuchh gunah nahīñ is meñ e'tirāf hī kar lo

jo chhupā.e phirte ho sab ke rū-ba-rū kah do

bojh kyuuñ rahe dil par apnī kam-kalāmī kā

buzdilī bhī achchhī hai chāhe tum ye na maano

shab jo ḳhvāb dekhā thā ek dasht-e-ḳhvāhish kā

apnā jī kaḌā kar ke aaj us se kah Daalo

ḳhuub hai sazā ye bhī kasb-e-kāmyābī kī

ek shab kī qīmat meñ ab to umr-bhar jaago

ek baar chhū lenā bas gul-e-badan us kā

ik matā-e-ḳhushbū hai haath umr-bhar chūmo

thā to vo bas ik lamha par ye us kā phailāo

chāhe ishrateñ us kī saarī zindagī likkho

ḳhvāb le ke aayā huuñ maiñ dukān-e-dushman par

is se besh-qīmat ab aur chiiz kyā becho

kuchh gunah nahin is mein e'tiraf hi kar lo

jo chhupae phirte ho sab ke ru-ba-ru kah do

bojh kyun rahe dil par apni kam-kalami ka

buzdili bhi achchhi hai chahe tum ye na mano

shab jo KHwab dekha tha ek dasht-e-KHwahish ka

apna ji kaDa kar ke aaj us se kah Dalo

KHub hai saza ye bhi kasb-e-kaamyabi ki

ek shab ki qimat mein ab to umr-bhar jago

ek bar chhu lena bas gul-e-badan us ka

ek mata-e-KHushbu hai hath umr-bhar chumo

tha to wo bas ek lamha par ye us ka phailao

chahe ishraten us ki sari zindagi likkho

KHwab le ke aaya hun main dukan-e-dushman par

is se besh-qimat ab aur chiz kya becho