کچھ ہم سے ظلمت شب ہجراں نہ پوچھئے

کچھ ہم سے ظلمت شب ہجراں نہ پوچھئے

زخمی دلوں سے درد کا عنواں نہ پوچھئے

یہ ناز یہ غرور یہ شعلہ صفت مزاج

کس خاک سے بنا ہے یہ انساں نہ پوچھئے

ہے موسم خزاں کا تسلط ہر ایک سو

کیسے منائیں جشن بہاراں نہ پوچھئے

آئینہ لے کے دیکھیے خود اپنے سرخ لب

ہوتا ہے کیسا لعل بدخشاں نہ پوچھئے

کیا ہوں کہاں ہوں کچھ بھی نہیں ہے مجھے خبر

بس عالم تصور جاناں نہ پوچھئے

جو آشنائے راز گل و یاسمن نہ ہو

اس بے خبر سے حال گلستاں نہ پوچھئے

کعبہ گیا کلیسا گیا میکدہ گیا

اس بے وفا کی دید کا ارماں نہ پوچھئے

انجمؔ نشاط و عیش میں گزری مری حیات

اب مجھ سے میرا حال پریشاں نہ پوچھئے