kuchh hashr se kam garmi-e-bazar nahin hai

kuchh hashr se kam garmī-e-bāzār nahīñ hai

vo jins huuñ maiñ jis kā ḳharīdār nahīñ hai

is raat ke gambhīr añdhere meñ hai kyā kyā

hāsil tujhe par dīda-e-bedār nahīñ hai

mumkin ho to siine meñ utar kar to mire dekh

vo laash huuñ maiñ jis kā azā-dār nahīñ hai

ik tere taġhāful ne kamar toḌ ke rakh dī

varna ġham-e-duniyā to mujhe baar nahīñ hai

hañstā hai mire sīna-e-sad-chāk pe kyā kyā

vo jis ke garebān meñ ik taar nahīñ hai

dil ḳhūgar-e-ġham kaun sā ġham pā ke jiyegā

varna tujhe paanā mujhe dushvār nahīñ hai

kis muñh se amaañ chāhūñgā sūraj se dobāra

sad-shukr ki yaañ sāya-e-dīvār nahīñ hai

chāhegā kise kis kā vafādār rahegā

ye dil jise ḳhud se bhī abhī pyaar nahīñ hai

kyā lutf hai rakhtā hai sar-e-lutf-o-karam bhī

'shohrat' ki tire ġham kā sazā-vār nahīñ hai

kuchh hashr se kam garmi-e-bazar nahin hai

wo jins hun main jis ka KHaridar nahin hai

is raat ke gambhir andhere mein hai kya kya

hasil tujhe par dida-e-bedar nahin hai

mumkin ho to sine mein utar kar to mere dekh

wo lash hun main jis ka aza-dar nahin hai

ek tere taghaful ne kamar toD ke rakh di

warna gham-e-duniya to mujhe bar nahin hai

hansta hai mere sina-e-sad-chaak pe kya kya

wo jis ke gareban mein ek tar nahin hai

dil KHugar-e-gham kaun sa gham pa ke jiyega

warna tujhe pana mujhe dushwar nahin hai

kis munh se aman chahunga suraj se dobara

sad-shukr ki yan saya-e-diwar nahin hai

chahega kise kis ka wafadar rahega

ye dil jise KHud se bhi abhi pyar nahin hai

kya lutf hai rakhta hai sar-e-lutf-o-karam bhi

'shohrat' ki tere gham ka saza-war nahin hai