kuchh is ada se hamein gham-gusar milte hain

kuchh is adā se hameñ ġham-gusār milte haiñ

hazār zaḳhm pas-e-e'tibār milte haiñ

shab-e-firāq kī vahshat na pūchhiye ham se

ham apne hijr se dīvāna-vār milte haiñ

ye shahr-e-zaḳhm-faroshāñ hai haa.e kyā kiije

ki pā-e-gul bhī yahāñ ḳhaar ḳhaar milte haiñ

vo jin kī kokh meñ shauq-e-ḳhirad panaptā hai

vo valvale bhī junūñ kā shikār milte haiñ

sajā ke rakhte haiñ jin ko chamak kī ḳhvāhish meñ

vo aa.ine bhī hameñ dāġh-dār milte haiñ

hameñ unhī se tavaqqo hai 'nāz' manzil kī

jo rāste hameñ ban kar ġhubār milte haiñ

kuchh is ada se hamein gham-gusar milte hain

hazar zaKHm pas-e-e'tibar milte hain

shab-e-firaq ki wahshat na puchhiye hum se

hum apne hijr se diwana-war milte hain

ye shahr-e-zaKHm-faroshan hai hae kya kije

ki pa-e-gul bhi yahan KHar KHar milte hain

wo jin ki kokh mein shauq-e-KHirad panapta hai

wo walwale bhi junun ka shikar milte hain

saja ke rakhte hain jin ko chamak ki KHwahish mein

wo aaine bhi hamein dagh-dar milte hain

hamein unhi se tawaqqo hai 'naz' manzil ki

jo raste hamein ban kar ghubar milte hain