kuchh is ada se nasim-e-bahaar jhum ke chal

kuchh is adā se nasīm-e-bahār jhuum ke chal

ki phuuT nikle dil-e-nā-murād kī koñpal

hasīñ chaman meñ badal jaa.e regzār-e-hayāt

sarāb-e-yās se paidā hoñ farhatoñ ke kañval

ka.ī baras se hai be-āb ābshār-e-talab

kabhī to mahv-e-karam ho umiid ke bādal

na raushnī na tarāne na raqs-e-mauj-e-shamīm

hanūz chashm-e-sahar meñ hai raat kā kājal

bahār meñ bhī hai phūloñ ko intizār-e-bahār

ḳhudā-e-bāġh ye tartīb-e-bāġh kuchh to badal

na chhup sakegā ġham-e-zindagī kā ruḳh 'az.har'

na Daal us pe fareb-e-ḳhayāl kā āñchal

kuchh is ada se nasim-e-bahaar jhum ke chal

ki phuT nikle dil-e-na-murad ki konpal

hasin chaman mein badal jae regzar-e-hayat

sarab-e-yas se paida hon farhaton ke kanwal

kai baras se hai be-ab aabshaar-e-talab

kabhi to mahw-e-karam ho umid ke baadal

na raushni na tarane na raqs-e-mauj-e-shamim

hanuz chashm-e-sahar mein hai raat ka kajal

bahaar mein bhi hai phulon ko intizar-e-bahaar

KHuda-e-bagh ye tartib-e-bagh kuchh to badal

na chhup sakega gham-e-zindagi ka ruKH 'azhar'

na Dal us pe fareb-e-KHayal ka aanchal