kuchh is andaz se gham ki murattab dastan kar len

kuchh is andāz se ġham kī murattab dāstāñ kar leñ

ham un ko rāz-dāñ kar leñ vo ham ko rāz-dāñ kar leñ

tabassum zer-e-lab nazreñ jhukī sharmā.e sharmā.e

isī andāz se zer-e-nagīñ saarā jahāñ kar leñ

unheñ ma.alūm kyā jehd-o-amal kyā hai kashākash kyā

zamīñ par baiThe baiThe jo tavāf-e-āsmāñ kar leñ

sadā aane lagī un kī hamāre dil ke zaḳhmoñ se

lahū ke qatre qatre ko ab un kī dāstāñ kar leñ

hamārī ābla-pā.ī kī azmat pūchhte kyā ho

agar chāheñ to ham zarroñ ko rashk-e-kahkashāñ kar leñ

koī nau-vāridān-e-sehn-e-gulshan se zarā kah de

chaman kī pattī pattī ko ab apnā mezbāñ kar leñ

jo rāz-e-husn se vāqif na hoñ ai 'dard' duniyā meñ

zarā vo jur.at-e-nazzāra-e-dīda-varāñ kar leñ

kuchh is andaz se gham ki murattab dastan kar len

hum un ko raaz-dan kar len wo hum ko raaz-dan kar len

tabassum zer-e-lab nazren jhuki sharmae sharmae

isi andaz se zer-e-nagin sara jahan kar len

unhen malum kya jehd-o-amal kya hai kashakash kya

zamin par baiThe baiThe jo tawaf-e-asman kar len

sada aane lagi un ki hamare dil ke zaKHmon se

lahu ke qatre qatre ko ab un ki dastan kar len

hamari aabla-pai ki azmat puchhte kya ho

agar chahen to hum zarron ko rashk-e-kahkashan kar len

koi nau-waridan-e-sehn-e-gulshan se zara kah de

chaman ki patti patti ko ab apna mezban kar len

jo raaz-e-husn se waqif na hon ai 'dard' duniya mein

zara wo jurat-e-nazzara-e-dida-waran kar len