kuchh is bala ka tera rabt-ashna hona

kuchh is balā kā tirā rabt-āshnā honā

ki har jafā kā ba-andāza-e-vafā honā

sitam-shi.ār tirī aarzū pe kyā mauqūf

kisī ḳhalish kā gavāra nahīñ judā honā

jahāñ meñ phir na kahīñ vaj.h-e-rashk ho jaa.e

tire karam se mirā mūrid-e-jafā honā

gudāz ishq se ma.amūr kar diyā mujh ko

muhāl hai tire ehsān se adā honā

vo shauq meñ tire iz.hār-e-nāz kā āġhāz

vo mere haal pe har jaur kā ravā honā

huā vo dād-e-vafā chāhne pe kyoñ barham

koī gunāh na thā tālib-e-jazā honā

shab-e-firāq vo halkī sī ik shuā-e-umīd

vo sub.h tak mire jiine kā aasrā honā

bisāt-e-dahr pe āsāñ nahīñ hai kuchh 'hirmāñ'

tirī nigāh ke aalam se āshnā honā

kuchh is bala ka tera rabt-ashna hona

ki har jafa ka ba-andaza-e-wafa hona

sitam-shiar teri aarzu pe kya mauquf

kisi KHalish ka gawara nahin juda hona

jahan mein phir na kahin wajh-e-rashk ho jae

tere karam se mera murid-e-jafa hona

gudaz ishq se mamur kar diya mujh ko

muhaal hai tere ehsan se ada hona

wo shauq mein tere izhaar-e-naz ka aaghaz

wo mere haal pe har jaur ka rawa hona

hua wo dad-e-wafa chahne pe kyon barham

koi gunah na tha talib-e-jaza hona

shab-e-firaq wo halki si ek shua-e-umid

wo subh tak mere jine ka aasra hona

bisat-e-dahr pe aasan nahin hai kuchh 'hirman'

teri nigah ke aalam se aashna hona