kuchh ishq-e-butan kuchh fikr-e-jahan dil yas ka mara kya kahiye

kuchh ishq-e-butāñ kuchh fikr-e-jahāñ dil yaas kā maarā kyā kahiye

kashtī ko talātum kā ḳhatra aur duur kināra kyā kahiye

apnoñ ke hamesha jaur-o-sitam ġhairoñ kā sahārā kyā kahiye

kis taur kiyā hai duniyā meñ do roz guzārā kyā kahiye

bhaTkā huā aañsū palkoñ kī chilman meñ laraztā hai aise

jaise ki ghaTā ke āñchal meñ uljhā huā taarā kyā kahiye

ḳhud baiThe biThā.e rotā hai ḳhud baiThe biThā.e hañstā hai

dil aas kā maarā kyā kahiye dil yaas kā maarā kyā kahiye

sajdoñ meñ mohabbat ke 'zarrīñ' jab josh-e-ibādat hotā hai

tab jā ke kisī ko tūfāñ meñ miltā hai kinārā kyā kahiye

kuchh ishq-e-butan kuchh fikr-e-jahan dil yas ka mara kya kahiye

kashti ko talatum ka KHatra aur dur kinara kya kahiye

apnon ke hamesha jaur-o-sitam ghairon ka sahaara kya kahiye

kis taur kiya hai duniya mein do roz guzara kya kahiye

bhaTka hua aansu palkon ki chilman mein larazta hai aise

jaise ki ghaTa ke aanchal mein uljha hua tara kya kahiye

KHud baiThe biThae rota hai KHud baiThe biThae hansta hai

dil aas ka mara kya kahiye dil yas ka mara kya kahiye

sajdon mein mohabbat ke 'zarrin' jab josh-e-ibaadat hota hai

tab ja ke kisi ko tufan mein milta hai kinara kya kahiye