kuchh kam nahin nadamat-e-pinhan KHata ke baad

kuchh kam nahīñ nadāmat-e-pinhāñ ḳhatā ke ba.ad

be-sūd hai har ek sazā is sazā ke ba.ad

fikr-e-ma.āsh ahl-e-mohabbat na kījiye

khāne ko ḳhūn-e-dil hai fareb-e-vafā ke ba.ad

is daur meñ karam kā ravādār kaun hai

pachtā.e kyuuñ koī sitam-e-nā-ravā ke ba.ad

shāhoñ ke saath ye bhī hai taqdīr kā mazāq

rizq-e-humā hoñ sāya-e-bāl-e-humā ke ba.ad

us kā ilaaj kyā hai ba-juz tark-e-mudda.ā

jab sāmnā ho yaas kā har mudda.ā ke ba.ad

tārīḳh us ko bhuul sakegī na ai vatan

aa.egā zikr-e-karb tirā karbalā ke ba.ad

be-mahrī-e-butāñ se ḳhudā yaad aa gayā

'mahrūm' kis ko yaad karoge ḳhudā ke ba.ad

kuchh kam nahin nadamat-e-pinhan KHata ke baad

be-sud hai har ek saza is saza ke baad

fikr-e-maash ahl-e-mohabbat na kijiye

khane ko KHun-e-dil hai fareb-e-wafa ke baad

is daur mein karam ka rawadar kaun hai

pachtae kyun koi sitam-e-na-rawa ke baad

shahon ke sath ye bhi hai taqdir ka mazaq

rizq-e-huma hon saya-e-baal-e-huma ke baad

us ka ilaj kya hai ba-juz tark-e-muddaa

jab samna ho yas ka har muddaa ke baad

tariKH us ko bhul sakegi na ai watan

aaega zikr-e-karb tera karbala ke baad

be-mahri-e-butan se KHuda yaad aa gaya

'mahrum' kis ko yaad karoge KHuda ke baad